camelo -la

Mamífero artiodáctilo, do xénero Camelus, pertencente á familia dos camélidos. Caracterízanse polo gran tamaño que acadan, uns 3 m de altura, o que significa que, despois dos elefantes e das xirafas, son os animais vivos meirandes da terra. No dorso presentan unha ou dúas xibas que constitúen reservas de graxa obtida en períodos de boa alimentación, e que empregan como fonte de enerxía en períodos de xaxún ou de traballo excesivo. As patas e o pescozo son longos e delgados, e separan o corpo do animal da alta temperatura diúrna que chega a ter o chan. Os camelos teñen un pelame abundante, as orellas pequenas, os ollos grandes e prominentes e o labio superior partido en dúas partes, que se poden mover independentemente; as ventas do nariz teñen forma de fenda e poden fecharse completamente, feito que resulta útil durante as tormentas de area. O estómago dos camelos ten numerosas expansións ou celas acuíferas, que constitúen unha reserva de auga metabólica. Son domésticos desde tempos remotos, e deles aprovéitase o leite e o pelo co que se fan tecidos suaves, cálidos e moi apreciados.

Especie, tamén chamada dromedario, que presenta unha única xiba. Provén de poboacións salvaxes que habitaban antigamente o Oriente Próximo e o Oriente Medio. Atópase en Arabia, en Exipto e nalgunhas rexións africanas, e introduciuse en diversos países (sur da Península Ibérica, Islas Canarias, Italia, Madagascar, América do Sur e Australia).

Especie que ten dúas xibas e é máis robusta có camelo común. Vive en Asia Central.