Caminha

Concelho do distrito de Viana do Castelo, no norte de Portugal. Integrado por vinte parroquias, acolle unha poboación de 15.895 h (1995). A capital é a vila de Caminha. Situada na foz do Minho, as súas praias (Foz do Minho, Moledo, Vila Praia de Âncora, Forte do Cão) convertérono nun centro turístico de gran relevancia. Outros puntos de interese turístico son a serra de Arga, o miradoiro de Santo Antão, o Parque do Camarido, o miradoiro do Calvário ou o Cruzeiro da Independência em Lanhelas. As principais actividades económicas do concelho, ademais do turismo, son a agricultura, a pesca, o comercio e a industria, especialmente a construción civil. No que respecta á agricultura, aínda que o número de explotacións foi diminuíndo, a superficie agraria útil aumentou. O desenvolvemento de produtos de calidade foi a liña de fortalecemento do sector, con referencia especial para o viño de Marinhas, variedade típica da rexión. Tamén existen no concelho dous importantes portos pesqueiros, en Caminha e en Vila Praia de Âncora; a flota é totalmente artesanal e o peso socioeconómico do sector é aínda considerable. Na industria transformadora asumen particular importancia os sectores da madeira e da cortiza, da metalurxia, maquinaria e material de transporte, así como as alimentarias. Entre o seu patrimonio arquitectónico destaca a igrexa matriz, gótica con elementos platerescos, construída por iniciativa do Rei Xoán II. Foi unha praza de grande importancia estratéxica nas guerras hispano-lusas que se sucederon dende o s XVI, como tamén o fora con anterioridade no transcurso das Guerras Irmandiñas, cando Pedro Álvarez de Soutomaior (Pedro Madruga), era o primeiro conde de Caminha.