Carlos/Carolina

Antropónimo de orixe xermánica procedente de karl. Pasou ao latín coa forma Carolus, de onde se formou o feminino Carolina. Pasou de ser nome común, co significado de ‘home libre sen pertenzas’, a designar o ‘mordomo do palacio real’ entre os francos. Logo converteuse en título e chegou a nome propio. A forma feminina presenta como variantes: Carlota (derivado do francés Charlotte) e Carla. Os hipocorísticos son Chapa, Carlucho/Carola. Este nome espallouse por toda Europa debido ao prestixio de Carlos I o Grande, Carlomagno, sobre todo entre nobres e monarcas. Celébranse as festividades de san Carlos Borromeo (1538-1584), cardeal de Milán, o 4 de novembro, e san Carlos Lwanga, mártir ugandés, o 3 de xuño.