Cerda

Liñaxe castelá descendente do infante Fernando de la Cerda, fillo primoxénito do Rei Afonso X o Sabio. A orixe deste apelido está no alcume (El de la Cerda) que se lle aplicou ao infante por ter o pelo longo no peito. Esta caste enlazou dende moi cedo coa máis alta nobreza española e francesa. Estendeuse por toda a Península e unha rama pasou a Chile. As súas armas levan, escudo acuartelado: primeiro e cuarto cuartel, en campo de goles, cun castelo de ouro (armas de Castela), partido de campo de prata, cun león rampante de goles, coroado de ouro (armas de León); segundo e terceiro cuartel, en campo de azul sementado de flores de lis de ouro (armas antigas de Francia).