Oitavo planeta do sistema solar, atendendo á súa proximidade ao Sol. A órbita é case circular, e a densidade é a maior de todos os planetas denominados xigantes, o que parece indicar que na composición de Neptuno interveñen unha cantidade importante de elementos pesados do mesmo tipo dos que constitúen a Terra. A magnitude aparente de Neptuno é de 7,7; polo tanto, non é observable a simple vista. A través do telescopio aparece como un disco verdoso de 2,4’ de diámetro. O seu elevado albedo, da orde de 0,5, indica a presenza dunha espesa atmosfera difusora. Neptuno está constituído por un núcleo de metal e de rochas envolvido por unha capa de xeo, e ten unha atmosfera composta principalmente por metano e hidróxeno. A temperatura nas rexións inferiores da atmosfera é duns -217°C, mentres que a das rexións superiores é de -133°C. Ata hai pouco coñecíanse dous satélites, Nereida e Tritón, pero ultimamente descubríronse seis novos, Náiade, Thalassa, Despina, Proteo, Galatea e Larisa. O descubrimento...
Deus romano do mar que se identificou co deus grego Posidón. Representábase como un home nu con barba que sostiña un tridente, e que ía enriba dunha carruaxe tirada por cabalos mariños e acompañado por tritóns, ou ben montado nun golfiño ou sentado enriba dunha áncora.
