condensación

Acción e efecto de condensar ou condensarse.

Paso dunha substancia do estado de vapor a un estado condensado, é dicir, ao estado líquido ou sólido; no primeiro caso, é a transición contraria á vaporización e, no segundo, é contrario á sublimación. Pode estar causada por compresión ou arrefriamento e nos dous casos o vapor libera calor, coñecido como calor latente de condensación. A condensación pode producirse sobre unha superficie máis fría ca o vapor en cuestión, e ten lugar cando a presión de vapor é máis grande ca a presión de vapor saturante das fases líquida ou sólida da substancia á temperatura da superficie sobre a que se produce a condensación. A condensación sobre unha superficie pódese producir de dúas maneiras. Na condensación en película fórmase sobre a superficie fría unha película cun grosor que depende das características físicas do fluído condensado, da forma xeométrica da superficie e da velocidade de condensación. Na condensación en gotas fórmanse gotas que se desprenden da parede sen chegar a mollala; este tipo prodúcese pola presencia de axentes contaminantes que, adheridos á superficie fría, impiden a formación dunha película continua. A condensación tamén se pode producir lonxe dunha superficie; neste caso, un vapor sen partículas en suspensión só se condensa cando chega á sobresaturación; sen embargo, se contén partículas suficientemente grandes en suspensión, estas actúan como núcleos de condensación sobre os que se forman as gotas.

Aumento de densidade.

Reacción na que se unen as dúas moléculas reaccionantes, a miúdo en presencia de catalizadores (con formación de auga) ou doutras substancias. Entre as máis coñecidas están a condensación de Claisen-Schmidt e a reacción de Friedel e Crafts.

Segundo a psicanálise, proceso inconsciente producido durante o sono que consiste nunha refundición de pensamentos ou contidos latentes nun só contido manifesto.

Proceso que ten lugar durante a división celular e que leva ao empaquetado da cromatina interfásica en cromosomas metafásicos.

Corpúsculos, xeralmente moi higroscópicos, sobre os que se inicia a condensación de vapor de auga atmosférica en forma de gotas, cando o grao higrométrico é suficientemente alto pero non chega á saturación.