crismón

Monograma do nome de Cristo formado polo enlazamento das dúas primeiras letras (X e P da palabra grega χριστός  ‘unxido’). Ás veces presenta forma de cruz e adoita aparecer acompañado dun A e dun Ω. Gravado xa en moedas de Constantino dende o 315 e situado na parte superior do seu estandarte, foi motivo decorativo en sarcófagos e outros monumentos. Na Idade Media empregouse na escritura de documentos. No Museo Diocesano de Lugo consérvase o crismón de Quiroga.