embalsamar

Evitar a putrefacción dos cadáveres inxectando nos seus vasos diferentes líquidos conservadores e enchendo ao mesmo tempo as súas cavidades con substancias olorosas e balsámicas. O que se pretende é evitar a multiplicación dos microbios, destruíndo os que estean presentes e impedindo a súa posterior contaminación, e a autólise dos sistemas enzimáticos do cadáver, para o que se empregan substancias coaguladoras das proteínas. Esta conservación dos mortos dunha maneira artificial xa se practicaba no antigo Exipto, baleirando as vísceras e enchendo o corpo con substancias pouco coñecidas como bálsamos ou resinas. O método de embalsamamento moderno máis habitual consiste en inxectar pola arteria carótide uns catro litros de líquido composto de formol, alcol etílico, auga destilada e hexametilenetetramina, uns dous litros pola arteria xeral, un litro en cada cavidade pleural e outro nas cavidades abdominal e cranial. Tamén existe un método de conservación temporal que consiste en poñer diversas inxeccións de líquido conservador nas cavidades intracardíaca, intracranial e intrapleural, e en certos puntos da masa muscular.

Encher de aromas balsámicos.