estilística

Disciplina lingüística, fundada por Charles Bally, que estudia os feitos expresivos da linguaxe organizados desde o punto de vista do seu contido afectivo, é dicir, a expresión dos feitos da sensibilidade por medio da linguaxe e a acción dos feitos da linguaxe sobre a sensibilidade. Ch. Bally céntrase especialmente na lingua falada e trata de extraer, non o sentido conceptual das unidades, senón os seus valores afectivos, na medida en que estes están codificados, é dicir, son compartidos por todos os usuarios.

Disciplina lingüística no limiar da ciencia literaria que estudia o estilo das obras literarias. Algúns autores, como Roman Jakobson, consideran o estilo esencialmente como unha elaboración da mensaxe lingüística; outros, como Pierre Guiraud, consideran que é unha desviación respecto dunha lingua usual. Non obstante , o problema básico da estilística literaria consiste en illar os trazos que desempeñan unha función estética nun texto.