eufrasia

Herbácea anual do xénero Euphrasia, da familia das escrofulariáceas, de ata 25 cm de altura, follas dentadas ou lobuladas dispostas ao longo de todo o talo. As flores presentan a corola bilabiada, de ata 15 mm de lonxitude, de cor branca con manchas amarelas no interior, co labio superior con forma de casco dividido en dous lóbulos recurvados, o inferior en tres segmentos, e anteras con dous mucróns desiguais. Os froitos son cápsulas polispermas dehiscentes. En Galicia están presentes, en lugares herbosos principalmente da montaña da metade oriental do país, as especies E. hirtella, E. minima e E. nemorosa.