híbrido -da

(< lat hybrĭda)

adx e s m [XEN]
Aplícase ao ser que provén do cruzamento entre individuos xeneticamente diferentes. O cruzamento entre especies próximas pode dar lugar a híbridos que xeralmente son estériles, como é o caso dos machos, produto do cruzamento do asno e a egua. Nos vexetais o cruzamento interespecífico é máis fácil, pode ser fértil e dar lugar á formación de novas especies. Os híbridos intraespecíficos son moi correntes, como no caso dos cans, que deu lugar a moitas razas diferentes.
1. adx e s
  Que ou o que está formado por elementos de diferente orixe.
2. adx [FÍS]
  Aplícase ao aparato ou circuíto que contén compoñentes de diferente tecnoloxía, como por exemplo tubos e transistores.
3. adx e s [LING]
  Aplícase á palabra composta formada con elementos que proceden de linguas diferentes.
4. adx [QUÍM]
  Aplícase ao orbital ou composto que sufriu unha hibridación.
5. híbrido de resonancia [QUÍM]
  Composto que participa de dúas ou máis estruturas resoantes.

Palabras veciñas