luminescencia

Emisión de luz que presentan certas substancias cando son convenientemente excitadas, que se produce sen ningunha elevación da temperatura e que se caracteriza polo feito de que a intensidade da radiación para determinadas lonxitudes de onda é máis elevada ca a correspondente á radiación térmica á mesma temperatura. Segundo a persistencia da emisión unha vez que cesou a causa excitante, a luminescencia divídese en fluorescencia e fosforecencia. Conséguese a excitación das substancias luminiscentes mediante a transmisión dalgún tipo de enerxía, que pode ser en forma de fotóns (fotoluminescencia), de electróns (catodoluminescencia), de enerxía dun campo eléctrico (electroluminescencia), de enerxía dun proceso químico ou biolóxico (quimioluminescencia ou bioluminescencia), de enerxía dunha onda ultrasónica (sonoluminescencia), de enerxía dun esforzo mecánico (triboluminescencia) ou de enerxía en forma de calor (termoluminescencia).