Muniellos, Reserva da Biosfera de

Carballeira declarada Reserva da Biosfera o 9 de novembro de 2000, e Reserva Natural Integral desde 2002. Está situada nos concellos de Cangas de Narcea e Ibias, no Principado de Asturias, e ocupa unha superficie aproximada de 5.643 ha. A vexetación, un dos seus principais atractivos, está constituída principalmente por carballo albar (Quercus petraea), acompañado en menor medida de bidueiro (Betula alba), faia (Fagus sylvatica), acivro (Ilex aguifolium) e teixo (Taxus baccata); tamén abundan os liques, dos que hai máis de mil especies. Respecto á fauna, pódense localizar especies ameazadas como a pita do monte (tetrao urogallus), o oso pardo (Ursus arctos) e o lobo (Canis lupus), xunto a outras especies máis abundantes como o xabaril (Sus scrofa), o raposo (Vulpes vulpes), o gato do monte (Felix silvestris), a marta (Martes martes), a londra (Lutra lutra) ou o peto mediano (Dendrocopus medius), así como moita diversidade de paseriformes. A súa visita está regulada pola Consejería de Agricultura do Principado de Asturias, de tal xeito que só poden acceder á Reserva 20 persoas por día.