Música en Compostela

Curso internacional de música clásica que se celebra durante o verán en Santiago de Compostela desde 1958, a partir dunha iniciativa de Andrés Segovia e José Miguel Ruiz Morales. O curso inclúe concertos que acompañan as clases maxistrais con músicos de renome internacional, entre os que destacan Xesús Bal Gay, Antonio Brossa, Montserrat Caballé, Gaspar Cassadó, Rodolfo Halftter, Federico Mompou, Joaquín Rodrigo e Victoria de los Ángeles. Dirixido por Antonio Iglesias Álvarez e especialmente orientado cara aos máis novos, o curso ten como obxectivo a perfección dos coñecementos na música española e galega. Ademais das clases de formación, realízanse unha serie de recitais públicos en distintas localizacións emblemáticas, como o Hostal dos Reis Católicos, o Auditorio de Galicia ou o Museo de Pontevedra.