nube

1. s f
   1. [METEOR]

      Agregado de diminutas gotas de auga ou de partículas de xeo que están suspendidas no aire. Cando o aire atmosférico cargado de vapor de auga se arrefría ata acadar o denominado punto de rosada, fórmanse a miúdo os núcleos de condensación, que son as gotas de auga que constitúen a nube. O arrefriamento que provoca a formación de nubes está asociado case sempre aos movementos ascendentes do aire. A masa de aire cargada de vapor sobe as capas atmosféricas superiores, onde a presión é menor, o que provoca a expansión da masa e o conseguinte arrefriamento (precipitación). A cor das nubes depende das partículas que as compoñen. As nubes pódense clasificar segundo o seu aspecto exterior, en xéneros, cada un deles designado por un nome latino e unha abreviatura, como é o caso de cirrus (Ci). Cada un destes xéneros pódese presentar en diferentes especies, que se distinguen polas particularidades da súa estrutura; segundo a súa transparencia en variedades; segundo a súa altura, en diferentes familias e segundo a súa orixe en nubes de convección, nubes de advección e nubes de fronte. Na meteoroloxía interesa coñecer non só a forma e a altura das nubes, senón tamén a velocidade e a dirección, mediante o nefoscopio, como tamén a cantidade (nubosidade).

      Sinónimos: nubre.

   2. Masa compacta de fume, gas, po ou partículas semellantes en forma de nube.

2. s f

   Conxunto numeroso de persoas, animais ou cousas.

   Ex: Comezou a chegar unha nube de xente e aí foi onde nos perdemos.

   Sinónimos: multitude, nubre.
3. s f

   Mancha abrancazada que se forma no ollo ou na capa exterior da córnea.

   Sinónimos: nubre.
4. s f

   Aquilo que escurece ou enturba a visión ou que altera a serenidade e a capacidade de concentración dunha persoa.

   Ex: Quedou sumido nunha nube de pensamentos.

   Sinónimos: nubre.
5. nube ardente [XEOL]

   Gran bóla incandescente de gas, po e vapor de auga, que é expulsada na erupción dun volcán, e que rola pola ladeira do volcán a velocidades superiores aos 150 km/h.

6. nube artificial [AGR]

   Fumareda espesa que se obtén, ou ben queimando materiais vexetais mollados con combustibles líquidos pesados, ou ben por expansión de gases fumíxenos, e que protexe as plantas das xeadas, especialmente primaverais.

7. nube electrónica [FÍS]

   1. Conxunto de electróns dun átomo, que xiran arredor do núcleo seguindo órbitas distintas.

   2. Conxunto de electróns que, nun tubo electrónico, ocupan unha zona do espazo entre os electrodos arredor do cátodo incandescente, provocando así a aparición dunha carga espacial.

8. nube interestelar [ASTRON]

   Concentración densa de gas e po interestelar.

9. nube radiactiva [FÍS]

   Nube de partículas radioactivas que se forma trala explosión dunha bomba nuclear ou dun accidente nunha central nuclear.

Frases feitas

• Andar/estar nas nubes. Estar distraído, sumido en pensamentos.

• Poñer polas nubes. Gabar esaxeradamente a alguén.

• Poñerse polas nubes. Subir moito o seu prezo algunha cousa.

• Andar/estar polas nubes. Ser algo moi caro.

Refráns

• Cando a serra se envolve na capa, non deixe-Ia túa casa.
• Ceo apedrado, agro mollado.
• Ceo de panza de burra, auga segura.
• Ceo escamento, ou chuvia ou vento.
• Ceo escamudo, vendaval duro.
• Ceo lastrado, piso mollado.
• Ceo ovellado, aos tres días mollado.
• Corren as nubes para Ourense: sol que nos quente.
• Día nubrado engana o ano.
• Sol en nubes engarrado ten a chuvia ao seu lado.
• Vale máis nubrado de agosto que sol de setembro.