Onde o Mundo se chama Celanova

Revista publicada en Celanova a partir de maio de 1986. Cunha periodicidade trimestral, editárona os concellos da Bola, A Merca, Cartelle, Celanova, Quintela de Leirado, Ramirás, Gomesende e Verea. O centro cultural Coelerni Solpor dirixiu esta publicación, cun consello de redacción encabezado por Manuel Araújo e Cesáreo Iglesias. Incluíu noticias locais (romarías, premios literarios e actos diversos), fotografías, banda deseñada, pasatempos e curiosidades. Prestou especial atención aos escritores da comarca como Curros Enríquez, Castor Méndez e Celso Emilio Ferreiro.