Paraná

Estado do S de Brasil, comprendido entre os de São Paulo ao N e Santa Catarina ao S (199.709 km2; 9.563.458 h [2000]). A súa capital é Curitiba. O territorio comprende unha pequena rexión costeira no Atlántico, coas baías de Paranaguá e de Guaratuba. A serra do Mar separa esta zona do altiplano interior. Cómpre diferenciar varios sectores no altiplano: un sector oriental, inmediato á serra do Mar; a plataforma de Curitiba, a parte máis habitada e máis antigamente colonizada; a plataforma dos Campos Gerais, ao N do val do río Itararé; e a plataforma de Guarapuava, a máis extensa e atrasada do territorio. A actividade agrícola é o principal recurso económico do estado. O predominio do café ocasiona unha submisión da economía do estado ás variacións do curso do mercado mundial. A industria concéntrase arredor dos principais núcleos urbanos e nela predominan os sectores alimentario e químico.