Pedro Barrié de la Maza, Fundación

Fundación sen ánimo de lucro creada por Pedro Barrié de la Maza, conde de Fenosa, en 1966. Con sedes na Coruña, a principal, e Vigo, está presidida por Carmela Arias y Díaz de Rábago, condesa de Fenosa. Leva a cabo un labor nos ámbitos da educación, investigación, cultura e servizos sociais. En 1994 creou o Instituto de Estudios Económicos de Galicia Pedro Barrié de la Maza (IEEG PBM) que ten como fins o avance da ciencia económica de Galicia, a mellora do coñecemento da súa realidade socioeconómica e o desenvolvemento do capital humano nesta materia. Para acadar isto, realiza investigacións científicas e prácticas que axudan á formación de economistas cun alto nivel de cualificación nas universidades galegas. Coa Universidade de Santiago de Compostela creou o Instituto da Lingua Galega (ILG) en 1971 e o Instituto Universitario de Ciencias Neurolóxicas Pedro Barrié de la Maza ese mesmo ano; e coa Universidade de Vigo o Instituto de Electrónica Aplicada Pedro Barrié de la Maza (1990). Ademais, colabora con outros centros de investigación en distintos campos, como a Real Academia Galega de Ciencias, e en diversos programas de investigación biomédica. Desenvolve tamén un programa de apoio social a persoas maiores con demencias neurodexenerativas e unha convocatoria de axudas a inciativas sociais no campo das drogodependencias e outras adicións. Promove bolsas de posgrao, as bolsas de bacharelato Colexios do Mundo Unido e bolsas para fillos de emigrantes galegos. No eido da cultura destacan, entre outras actividades, a reconstrución dos instrumentos do Pórtico da Gloria (1988-1991) e a do coro pétreo do mestre Mateo (1995-1999). Conta cun servizo de publicacións. En 1976 estableceu os Premios Vitalicios e en 1982 o Premio de Investigación Raíña Sofía para a Prevención da Subnormalidade. Recibiu, entre outros galardóns, a Medalla de Oro al Mérito en las Bellas Artes (1998) e o nomeamento da condesa de Fenosa como primeira académica de honra da Real Academia Galega de Ciencias (2000), como agradecemento á fundación.