prehistórico -ca

Relativo ou pertencente á prehistoria.

Que é anterior aos tempos chamados históricos.

Arte propia da época prehistórica. Desde as primeiras fases do Paleolítico Superior hai testemuños artísticos de calidade. Do período auriñacense consérvanse pequenas figuras femininas (Venus de Willendorf) e animais, plaquiñas gravadas ou pintadas e ferramentas de óso decoradas con gravados, como arpóns. Durante o Solutreano e sobre todo o Madalenense produciuse o primeiro gran florecemento da pintura rupestre, con pinturas e gravados feitos sobre as paredes das covas. Durante o Neolítico comezou a coroplastia, especialmente na conca mediterránea, e cara ao final do período e durante a Idade dos Metais comezou a primeira arquitectura monumental, coas tumbas megalíticas do mundo mediterráneo e da Europa Atlántica.