reactor

Motor de reacción que consome o osíxeno do aire como comburente e que funciona por reacción directa, sen accionar apenas hélice.

Avión impulsado por un ou máis motores de reacción.

Recipiente en que se efectúa industrialmente unha reacción química.

Matraz que ten distintas bocas, de diferentes diámetros, para poderlle ser incorporados aparatos, como un axitador, un termómetro, un refrixerante ou un funil de adición, para poder levar a cabo reaccións.

Dispositivo deseñado para producir, de maneira controlada, unha reacción nuclear, de fisión ou de fusión, co fin de aproveitar a enerxía ou a radiación liberada, e que é o compoñente esencial dunha central nuclear. Distínguense dous tipos básicos de reactores: os de neutróns lentos e os de neutróns rápidos. Os reactores de neutróns lentos utilizan como combustible nuclear o uranio natural, ou ben uranio enriquecido. Unha vez utilizado o combustible, cómpre procesalo e almacenar os residuos radioactivos. Este tipo de reactor ha de incluír un moderador, que emprega auga, auga pesada ou grafito. O combustible e o moderador son os elementos esenciais do núcleo do reactor, que xeralmente non é máis ca unha ringleira de barras de combustible que penetran en cadanseu orificio feito no moderador. A enerxía liberada no núcleo do reactor extráese mediante un fluído, o caloportador, que transporta a enerxía, en forma de calor, ata un intercambiador de calor, que a miúdo é un xerador de vapor. Cómpre distinguir, en todo reactor, o circuíto primario, que é o circuíto que recorre o polo caloportador, e o circuíto secundario, que é o realizado polo circuíto que transporta a enerxía ata o transformador de enerxía. O conxunto formado polo reactor, o circuíto primario e o intercambiador de calor denomínase caldeira nuclear. No núcleo orixínanse radiacións, polo que é imprescindible tomar medidas de protección do persoal con medidas de blindaxe e tamén reducir ao mínimo o risco de contaminación radioactiva, o que se realiza a base de aceiro e formigón no vaso, o edificio de contención e o casco. Os reactores de neutróns rápidos utilizan como combustible o 238 U e o 239 Pu, o que fai innecesario o moderador. O seu caloportador adoita ser o sodio líquido. En todo reactor o rendemento máximo acádase cando é máxima a temperatura do caloportador, o que fixo desenvolver os reactores de alta temperatura. Distínguense diversas familias habituais de reactores segundo os criterios escollidos para a clasificación, dos que o máis empregado é o que os clasifica segundo o caloportador empregado: os PWR (Presurized Water Reactor, ‘reactor de auga a presión’) en que o combustible é uranio enriquecido, o moderador é auga e o caloportador é auga a presión; os BWR (Boiling Water Reactor, ‘reactor de auga fervente’) en que o combustible é uranio enriquecido, o moderador é auga e o caloportador é auga en ebulición; unha modificación deste é o LWGR (Light Water Graphite Reactor, ‘reactor de auga e grafito’); os GCR (Gas Cooled Reactor, ‘reactor de gas frío’) en que o combustible é uranio natural, o moderador é grafito e o caloportador é dióxido de carbono; modificacións deste son o AGR (Advanced Gas Reactor, ‘reactor de gas avanzado’) e o HTGR (High Temperature Gas Reactor, ‘reactor de gas a alta temperatura’); os HWR (Heavy Water Reactor, ‘reactor de auga pesada’) en que o combustible é uranio natural, e o moderador e caloportador é auga pesada; son modificacións os PHWR (Pressurized Heavy Water Reactor, ‘reactor de auga pesada a presión’). Os reactores piscina consisten nunha rede de barras de combustible somerxidas nun recipiente aberto (vaso aberto), cheo de auga, que fai de moderador, caloportador e blindaxe. Son reactores homoxéneos aqueles en que combustible e moderador están intimamente unidos en forma de disolución, e reactores heteroxéneos aqueles en que o combustible está en forma de barras, esferas ou placas introducido no seo do moderador. O primeiro reactor nuclear foi posto en marcha por E. Fermi e os seus colaboradores, na Universidade de Chicago, en 1942.