Romania

Área xeográfica dos pobos de civilización latina ou onde se fala algunha lingua derivada do latín. Desde Friedrich Christian Diez adoita dividirse en Romania Occidental e Romania Oriental. Walther von Wartburg sinala como fronteira de ambas as dúas unha liña que vai desde La Spezia ata Rimini. A primeira, situada ao N e ao O desa liña, sonoriza as oclusivas xordas intervocálicas (AMĪCA > gal, port, cat e cast amiga) e mantén o -s final (DŬŌS > gal dous, port dois, cat dos e cast dos); a Romania Oriental, que comprende os territorios situados ao L e S desa fronteira, conserva as oclusivas intervocálicas sen sonorizar (ital amica) e perde o -s final (ital due).