siderurxia

Conxunto de técnicas e procedementos que permiten a extracción do ferro e a elaboración de todos os seus derivados. Integra todo o proceso que vai desde o tratamento das materias primas, previo á fundición, ata a obtención do produto siderúrxico, incluídos os estadios de produción intermedios e a fabricación de aceiros. Desde un punto de vista económico, foi un dos sectores clave que permitiron o desenvolvemento industrial que caracterizou a evolución das economías occidentais desde a década de 1960. A razón está no feito de que os produtos siderúrxicos son a base de moitas actividades e producións industriais, como as integradas na industria metalúrxica, na fabricación de bens de equipamento, maquinaria e produtos metálicos, e na industria do transporte.