simulador -ra

Que ou quen simula algo.

Modelo material que simula un fenómeno físico ou que permite reproducir o comportamento de determinados dispositivos, máquinas ou instalacións para estudar o seu comportamento dinámico ou adestrar a alguén no seu manexo. Nos simuladores pasivos o modelo está xeralmente constituído por un circuíto eléctrico cuxo comportamento é análogo ao do fenómeno que se quere estudar. Nos simuladores activos un modelo matemático da realidade baixo estudo é tratado mediante un ordenador ou unha calculadora analóxica. Os simuladores espaciais utilízanse para recrear en terra as condicións de lanzamento ou voo dos aparatos espaciais e os simuladores de voo serven para ensinar aos pilotos o manexo dun avión. Existen outros simuladores como os de tiro, os de radar ou os de funcionamento dun reactor nuclear.