talibán -bá

Relativo ou pertencente aos talibáns.

Membro dos talibáns.

Grupo integrista islámico radical afgán fundado en 1994 por Mohamed Omar Akhund. Integrado por estudantes de teoloxía islámica, xurdiu nas madrasas afgás como unha milicia cuxo obxectivo era o de homoxeneizar cultural e relixiosamente o país, para poñer fin ao caos étnico e relixioso posterior á retirada das tropas soviéticas (1989). Apoiados economicamente por Pakistán e Arabia Saudí, os talibáns conquistaron Kabul e derrocaron o goberno musulmán moderado de Rabbani, que substituíron por un goberno fundamentalista entre 1996 e 2001. Inmediatamente proclamaron o Emirato de Afganistán e impuxeron a sarī’a, lei que implicaba estritas normas de conduta, para homes -que foron obrigados a deixar barba- e mulleres, ás que prohibiron estudar e traballar e obrigaron a cubrirse totalmente. Ademais, condenaron o paganismo (en 2001 destruíron os budas de Bamiyán). En 2001, despois do ataque do 11 de setembro a EE UU atribuído a Osama Ben Laden, -xefe da rede terrorista Al-Qaeda, instalada en Afganistán- o goberno estadounidense, apoiado entre outros por Reino Unido, tomou represalias e atacou o país. O goberno talibán foi substituído por un goberno provisional co que se iniciou o proceso de pacificación do país.