torcer

1. v t

   Deformar un corpo ao darlle voltas sobre si mesmo e facer xirar cada un dos seus extremos nunha dirección contraria, de xeito que adquira unha forma helicoidal.

   Ex: Non torzas tanto a roupa que a vas romper.

2. v t

   Facer que algo adquira unha forma curva.

   Ex: Torceu o ferro no lume.

3. v t

   Forzar unha articulación ao realizar un movemento de flexión violento e especialmente en sentido contrario ao natural.

   Ex: Tropezou e torceu un pé.

4. v t

   Facer que algo tome unha dirección, unha posición ou unha orientación distinta á que tiña.

   Ex: Cando me viu torceu a cabeza para non me saudar.

5. v t

   Poñer algo que estaba en posición vertical en posición oblicua.

   Ex: O vento torceu a figueira.

6. v i

   Coller algo ou alguén unha dirección distinta á que tiña.

   Ex: Na seguinte rúa torces á dereita e xa o ves.

7. v i

   Tomar algunha cousa unha posición inclinada cara a algún lado.

   Ex: As árbores torcían co vento.

8. v pron

   Inclinarse algunha cousa cara a algún lado.

   Ex: As flores torcíanse coa forte choiva.

9. v pron

   Evolucionar algunha cousa de maneira negativa ou distinta ao esperado.

   Ex: Non tardaron moito en torcerse as cousas.

Frases feitas

• Torcer o bico/fociño. Manifestar desacordo con algo ou alguén.