Torres y Sáez

Empresa fundada na Coruña en 1897 por Manuel Torres García e Manuel Fernández López como almacén de ferraxaría co nome de Fernández y Torres Sociedad Regular Colectiva. Ao pouco incorporáronse Ángel Torres García, irmán do fundador, e Manuel Sáez Torres, sobriño destes. En 1926 liquidouse a empresa anterior e xurdiu Torres y Sáez Sociedad Regular Colectiva. De carácter familiar, a empresa tiña establecementos na Coruña, Vigo e Lugo, que en 1974 se converteron en sociedades anónimas. Ese mesmo ano a división de ferros constituíu Hierros Torres y Sáez. Na década de 1990 constituíuse Almacenes Torres y Sáez, como cabeceira, e diversas sociedades filiais para atender a diversificación dos clientes.