Vagalume

Revista publicada en Santiago de Compostela a partir de xaneiro de 1975, que cesou en maio de 1978 (nº46). Subtitulada “Publicación infantil e xuvenil”, foi a primeira revista galega dirixida aos máis pequenos no período da Transición. Tras o primeiro número, pasou a publicarse quincenalmente en Pontevedra, dirixida primeiro por Marta I. García de Leániz e logo por Xosé Fortes. De carácter progresista e galeguista, incluíu contos, xeografía galega, matemáticas, ciencias e concursos dirixidos aos nenos, así como banda deseñada. Foi unha das primeiras publicacións monolingües en galego nese momento e tivo colaboracións de mestres ligados ao Movemento Cooperativo de Escola Popular Galega.