zamborca

Peixe clupeiforme, duns 50 cm de lonxitude, co corpo comprimido lateralmente e unha quilla ventral de escamas fortemente carenadas. É azul verdosa no dorso, prateada nos flancos e na zona ventral e amosa unha ou dúas manchas negras detrás do opérculo. Aliméntase de zooplancto e é unha especie anádroma que penetra nos grandes ríos durante a primavera para realizar a desova. En Galicia atópase durante a desova nos ríos Miño, Ulla e Umia.