Festuca

Xénero de herbáceas perennes, da familia das poáceas, de panículas amplas, laxas e flexuosas, formadas por espiguiñas grandes, pouco comprimidas e cun longo pecíolo. Estas espiguiñas teñen entre 7 e 10 flores de cor verdosa nun principio e amarelentas cando maduran. As flores presentan a lema mútica co dorso arredondado, tres estames e estilos de inserción apical. En Galicia están presentes: nas montañas, Festuca airoides, F. elegans, F. indigesta, F. nevadensis, F. paniculata, F. pseudotrichophylla, F. rothmaleri e F. trichophylla; en solos secos e rochosos, F. ampla, F. eskia, F. nigrescens e F. ovina; en areas litorais, F. juncifolia; en ribeiras, costas e praderías húmidas, F. arundinaceae; en lugares húmidos e sombríos, F. rivularis; e en bosques, F. gigantea, F. heterophylla e F. altissima. A especie máis amplamente difundida é F. rubra, que forma parte das comunidades de herbáceas, tanto de dunas, uceiras como de bosques.