molécula

Agregado de átomos, enlazados entre eles quimicamente, que é electricamente neutro. Poden estar formadas por un número ben definido e en xeral pequeno de átomos (moléculas discretas, que normalmente existen tanto en estado gasoso coma en estado condensado), ou por agregados de átomos ou ións que existen indefinidamente no espazo, sexa nunha dirección (cadeas infinitas), en dúas (capas infinitas) ou en tres (estruturas tridimensionais infinitas). Nestes últimos casos, as moléculas denomínanse moléculas xigantes. Os sólidos denominados moleculares (constituídos por cristais en que as moléculas ocupan os nós do retículo) e os líquidos moleculares, normais ou asociados, son agregados de moléculas discretas, e neles as forzas que manteñen a cohesión entre as moléculas (forzas de van der Waals ou enlaces de hidróxeno) son moito máis febles ca as forzas de valencia que enlazan os átomos ao interior da molécula. En consecuencia, as distancias intermoleculares son netamente máis elevadas que as intramoleculares. As moléculas xigantes en que os enlaces entre os átomos son de natureza covalente denomínanse tamén macromoléculas; este termo aplícase tamén ao caso das moléculas discretas, existentes soamente en estado condensado, que están constituídas por un número moi elevado de átomos. As macromoléculas discretas poden agruparse tamén dun xeito ordenado formando cristais.