² poder

1. 1. Facultade ou capacidade para facer unha cousa.

      Ex: Ten moito poder de convición. Din que tiña poderes máxicos. 

   2. Capacidade ou eficacia que ten algo.

      Ex: O imán ten o poder de atraer o ferro. A penicilina G ten poder sobre as bacterias Gram-positivas. 

   3. poder absorbente [FÍS]

      coeficiente de absorción.

   4. poder calórico [ALIM]

      Cantidade de calorías producidas no organismo por unidade de peso dun alimento.

   5. poder calorífico [FÍS]

      Cantidade de calor que libera unha unidade de masa (ou de volume se é un gas) dun combustible nunha combustión completa. Xeralmente exprésase en quilocalorías por quilo (ou por m 3 normal se é un gas). Se na combustión hai formación de auga, defínese o poder calorífico superior (PCS) tomando os elementos e os produtos da combustión levados a 0°C, supoñendo que a auga formada estaba condensada; cabe distinguir entre o PCS, a presión constante, e o PCS, a volume constante. De xeito semellante, defínese o poder calorífico inferior (PCI) supoñendo que a auga formada na combustión queda en estado de vapor. OBS: Tamén se denomina potencia calorífica.

   6. poder de definición/ [IMAX/FÍS]

      Capacidade dun obxectivo para reproducir os detalles dunha imaxe.

   7. poder dispersivo [FÍS]

      Característica dun medio transparente respecto da radiación electromagnética, definida como a relación entre a diferenza das desviacións D das raias F e C do hidróxeno, de lonxitudes de onda λ <J>F</J> = 0,486 μm e λ <J>C</J> = 0,656 μm, e a desviación da raia D do sodio, de lonxitude de onda λ <J>D</J> = 0,589 μm, ao atravesar un prisma de ángulo φ pequeno (é dicir, φ ≈ sen φ) feito co material que constitúe ese medio. O inverso do poder dispersivo denomínase constrinxencia.

   8. poder polarizante [QUÍM]

      Capacidade dun ión de provocar a polarización dun ión de signo contrario. É importante sobre todo para os catións. Aumenta co cociente carga/raio 2 e depende da configuración electrónica, que é máis grande cando o ión non ten a configuración de gas nobre (regras de Fajans).

   9. poder rotatorio [FÍS]

      Xiro angular que experimenta o plano de polarización ao atravesar a unidade de grosor, nunha substancia opticamente activa. É función da lonxitude de onda da luz empregada e asígnaselle o signo + ou - segundo que a substancia sexa dextroxira ou levoxira. No caso dun líquido hai que precisar a súa densidade ou concentración, e recibe o nome de poder rotatorio específico.

   10. poder separador/resolutivo/de resolución [FÍS]

       Característica dun sistema óptico que determina a distancia mínima que ten que haber entre dous puntos para que, ao observalos a través do sistema, poidan verse separados. O poder separador do ollo humano recibe o nome de agudeza visual.

2. 1. Dominio legal ou efectivo que se ten sobre alguén ou algo.

      Ex: O país foi sometido ao poder dos invasores. Ten poder para contratar a quen queira. As probas están en poder da policía. 

   2. Capacidade de influír sobre algo ou alguén.

      Ex: Non teño poder sobre ela para convencela. 

   3. [ECON]

      Dominio que unha persoa, un grupo ou un país ten sobre os bens e servizos de consumo ou sobre os factores produtivos, como os recursos naturais, a forza de traballo, a tecnoloxía ou o capital acumulado.

   4. poder adquisitivo [ECON]

      Cantidade de bens ou servizos que se poden adquirir cunha determinada cantidade de diñeiro. Flutúa inversamente ás variacións que experimentan os prezos dos bens.

   5. poder compensador [ECON]

      Reacción espontánea que as empresas ou grupos non oligopolistas, como por exemplo os consumidores ou os sindicatos, realizan para contrarrestar os efectos da actuación dos grupos ou empresas que controlan o mercado.

   6. poder liberador [ECON]

      Facultade de liberar débedas que as autoridades monetarias conceden a determinados tipos de diñeiro.

3. [DER/POLÍT]

   1. Goberno dun estado.

      Ex: Chegou ao poder tras gañar as eleccións. 

   2. Conxunto de funcións da Administración Pública dispostas para ditar, executar e interpretar leis, dirixir a administración do benestar público e soster a orde pública. A súa concentración tradicional nunha soa persoa, poder absoluto, adoita dexenerar en despotismo e ditadura. Para evitar esta arbitrariedade, fixéronse diversas clasificacións. Nos países democráticos estableceuse a división de poderes entre poder lexislativo, órgano encargado de facer e discutir as leis, ou parlamento; poder executivo, encargado de executar as leis, ou goberno; e poder xudicial, encargado de sancionar cando non se cumpren as leis, ou tribunais.

   3. Conxunto de forzas dun estado, especialmente as militares.

   4. poder moderador

      Xefe de estado nos réximes pluripartidistas que, situado por riba dos partidos e dos gobernos e como símbolo da unidade dos poderes executivo, lexislativo e xudicial, regula a vida política de acordo coa expresión da vontade electoral.

4. [DER]

   1. Capacidade xurídica, legalmente escriturada e outorgada por mandato, que permite actuar en nome e a favor doutra persoa. OBS: Adoita empregarse en plural con sentido singular.

   2. Instrumento ou acta en que consta este dereito.

5. Forza ou vigor.

   Ex: O teu avó aínda ten poder para levar ao lombo o saco de patacas. O poder do vento levantou o tellado. 

6. cuarto poder [COMUN]

   Poder formado pola prensa ou os medios de comunicaión.

7. poder espiritual [RELIX]

   Autoridade relixiosa ou eclesiástica que rexe os asuntos exclusivos da vida relixiosa e da conciencia.

8. poder temporal

   1. Poder civil ou político, en oposición ao poder espiritual.

   2. [RELIX]

      Poder civil exercido pola autoridade eclesiástica, sobre todo polos papas, sobre un territorio. Historicamente é a potestade que corresponde ao papa como xefe dos Estados Pontificios (Cidade do Vaticano). A súa orixe, derivada tradicionalmente da Doazón de Constantino, provén das doazóns dos reis carolinxios do s VIII que, co tempo, constituíron os Estados Pontificios.

Frases feitas

• A poder de loc prep Con insistencia e esforzo. Ex: Conseguiu o que ten a poder de traballo.