abacá

Especie semellante ao bananeiro, pero de follas máis estreitas. Require solos permeables, un clima cálido con precipitacións abundantes distribuídas ao longo do ano e unha humidade permanente. Cultívase en Filipinas e na América Central. As follas proporcionan un filamento téxtil chamado cánabo de Manila.

Fibra téxtil de cor esbrancuxada, chamada tamén cánabo de Manila, extraída das vaíñas foliares da planta do mesmo nome. Lixeira, elástica e resistente, emprégase na fabricación de cordeis e cables, sobre todo para o mar, polo feito de ser menos alterable á corrosión da humidade ca o cánabo común.

Tecido tosco fabricado coa fibra do mesmo nome. O máis basto emprégase para a embalaxe, o máis fino en confección.