áloe

Nome vulgar que reciben as especies que pertencen ao xénero Aloe, da familia das liliáceas. Son plantas perennes, herbáceas, ás veces bastante altas e ata arborescentes, acaules e con follas longas e suculentas, xeralmente de marxes espiñentas, dispostas en roseta basal. Presentan flores tubulosas, brancas, amarelas ou vermellas, que se agrupan en vistosas inflorescencias por riba dun longo talo florífero. Das follas dalgunhas especies (A. sucotrina, A. ferox, A. perry, etc) obtense unha substancia resinosa e amarga que se emprega como purgante. A maioría das especies deste xénero son orixinarias do Sur de África, en Galicia aparecen como plantas ornamentais.