altitude

altitude absoluta Altitude real dunha aeronave sobre a superficie da Terra.

altitude corrixida Altitude dunha aeronave, unha vez feitas as correccións dos erros de medición dos aparellos e compensadas as diferencias entre as condicións reais e a atmosfera tipo na altura indicada polo altímetro de presión.

altitude crítica Máxima altitude na que se pode manter unha presión determinada na admisión do motor dunha aeronave, sen toma dinámica de aire nin compresor, para un número de revolucións dado.

altitude de aproximación final Altitude á que ten que comezar a aproximación final dunha aeronave.

altitude de aproximación frustrada Altitude mínima á que ten que abandonar a aproximación final unha aeronave.

altitude de cruceiro Altitude constante, mantida durante todo o voo dunha aeronave, ou cando menos nunha parte, que se corresponde co máximo rendemento dos motores.

altitude de densidade Altitude que na atmosfera estándar correspondería a unha densidade dada.

altitude de equilibrio Altitude na que é anulada a forza ascensional dun aeróstato libre sen motor.

altitude de presión Altitude na atmosfera tipo na que un globo inflado ao nivel do mar en condicións dadas acada unha sobrepresión determinada.

altitude de presión na aeronave Altitude que na atmosfera estándar correspondería a unha presión dada e que dá unha estimación da altura real dunha aeronave.

altitude de seguridade Altitude mínima á que unha aeronave con instrumentos de voo pode operar en condicións de seguridade.

altitude indicada Altitude obtida da lectura directa do altímetro; se este é do tipo de presión, na altitude indicada non son corrixidos os erros do aparello nin compensadas as diferencias entre as condicións atmosféricas reais e as da atmosfera tipo.

altitude real Distancia vertical entre unha aeronave e un nivel definido, por exemplo, o nivel medio do mar en Alacant.