bentos

Conxunto de organismos que habitan sobre os fondos das masas de auga tanto continentais como mariñas, fixos, soterrados no substrato ou desprazándose pola superficie. Comprende comunidades de estrutura complexa e moi estable, e que, en maior ou menor grao, dependen doutras comunidades menos estruturadas pero máis produtivas como o plancto. Divídese en tres zonas: o epibentos, que comprende dende o límite coa superficie ata os 180 m de profundidade; o mesobentos, entre os 180 e os 1.000 m; e o hipobentos por debaixo dos 1.000 m de profundidade.