bulir

1. Publicación municipal, subtitulada “Voceiro do concello de As Nogais”, que apareceu en novembro de 1987 e desapareceu en 1990. Froilán Pallín Seco coordinou esta revista bilingüe de periodicidade irregular. Pola redacción pasaron Xulia García, Álvaro Bello, Cristina López, Pilar Pérez e Manuel Álvarez Prieto. Contou coa colaboración de Yolanda Antela, Gonzalo Latorre, María Xosé Nistal, Xosé Rico, Pablo Ruíz, Carmen Díaz Abraira, Ramón Pereira e Constantino López, entre outros. Malia a que nun principio contaba con seccións como “Entrevistas”, “Educación”, “Sanidade”, “O noso concello”, “Xuventude e deportes”, “Benestar” e outras, esta división fíxose máis flexible para incluír outras seccións de interese como “Medio ambiente” ou “Aula aberta”. Nas súas páxinas reproducíronse poemas de Manuel María, Xavier Prado “Lameiro” e doutros poetas locais. Tamén se rexistrou a versión galega dun poema de Cavafis, un fragmento do Catecismo do labrego, de Lamas Carvajal, ou a transcrición dunha conferencia de Fernández del Riego, xunto coas coplas do Cancioneiro popular galego, editado pola Fundación Pedro Barrié de la Maza. Os números 3, 4 e 5 levaban un suplemento que se titulaba O bulir na escola. Os nenos da comarca redactaban este suplemento que recolle cantigas populares, ditos, adiviñas ou poesías. Había artigos moi interesantes como “Estudio sobre o vocabulario da nosa zona” ou “Cousas para o recordo”, onde se falaba de aparellos antigos. Tamén incluíu narracións como A garduña aventureira ou O paraíso, que gañou o primeiro premio no concurso do Día das Letras Galegas.

2. v i

   Realizar algo con rapidez.

   Ex: Se non boles coa limpeza da cociña non vas ter tempo para ir á praia.

   Sinónimos: apurar.
3. v i

   Moverse axitadamente e con rapidez dun lado para outro.

   Ex: As formigas bulían no azucre. Os actores bulían nos camerinos antes de saír a escena.

   Sinónimos: buligar.
4. v i

   Ferver a auga ou outro líquido.

   Ex: O caldo bulía na tarteira.

5. v i

   Axitarse unha cousa pola acción ou polo impulso doutra.

   Ex: As follas do carballo bolen co vento.

6. v i

   Axitarse ideas na imaxinación ou no pensamento.

   Ex: As ideas para realizar a escultura bulíanlle constantemente na cabeza.

Frases feitas

• Bólelle o corpo. Que está inquieto e desasosegado. Ex: Bólelle o corpo por non saber se aprobou o exame.

• Bule, bule!/Axiña, bule! Apúrate, móvete. Ex: Bule, bule, que perdemos o tren!.

• Bólenlle os pés. Que sempre está activo facendo algo.

• Bule lixeiro. Vaite de seguida.

• Bulir en balde. Perder o tempo. Ex: Buliu en balde porque non lle serviu de nada o traballo feito.

• Bulir no caletre. Teimar. Ex: A decisión de abandonar a carreira bólelle no caletre.

• Que van bulindo. Forma que as pescantinas coruñesas e as doutros portos pesqueiros empregaban para pregoar polas rúas as sardiñas, indicando que son frescas e acabadas de pescar.