cabernet*

ariedades de uvas orixinarias da rexión francesa de Bordeos. Os seus acios son de vida media e de forma irregular, con grans pequenos, esféricos e cheos de sementes, de cor negra e de gusto agre, que maduran a media estación. A variedade cabernet franc, de características moi próximas á uva mencía, produce viños tintos suaves e rosados, levemente acedos e afroitados. A variedade cabernet sauvignon ten un poderoso sabor e aroma e é moi rica en tanino; é a variedade de uva máis cultivada do mundo debido á súa gran calidade, bos rendementos e facilidade de cultivo. Orixina viños cunha grande estrutura que requiren avellentamento e, frecuentemente, a mestura con outras variedades de uva. Cultívase en moitas outras rexións vitivinícolas de Norteamérica, Sudáfrica e Europa, destacando, sobre todo, no val do Loire. A AOC (Appellation d’Origine Contrôlée) Cabernet protexe os viños procedentes das célebres aldeas do Haut Médoc bordelés: Saint Stèphe, Saint Julien, Margaux e Pauillac. A variedade cabernet noir ten unha calidade inferior.