cacto

Plantas da familia das cactáceas, que comprende unhas 2.200 especies propias do continente americano e de ambientes desérticos ou áridos. Presentan numerosas adaptacións á escaseza de auga: talos engrosados con capacidade fotosintética e, xeralmente, cunhas costelas lonxitudinais que lle permiten á planta aumentar o seu volume para almacenar auga tralas escasas chuvias; follas, as máis das veces transformadas en espiñas ou escamas; un sistema radicular moi desenvolvido, especialmente de xeito horizontal; cutículas grosas e poucos estomas. Por outra banda son plantas tipo CAM, que fixan o carbono pola noite. As flores son hermafroditas, vistosas e inseridas directamente sobre o talo; polinizadas por insectos, aves ou morcegos, dan lugar a un froito en bago que, nalgunhas especies, é comestible polo home. En Galicia ademais das especies cultivadas en testos, no interior das vivendas ou en invernadoiros, empréganse en xardinería plantas dos xéneros Cereus, Nopalxochia e Opuntia.