cecidio

Hipertrofia de tecidos vexetais inducida por axentes físicos ou químicos diversos, producidos xeralmente por parasitos. Reciben distintos nomes dependendo de que os parasitos sexan animais (zoocecidios), plantas (fitocecidios), fungos (micocecidios), insectos (entomececidios), ácaros (acarocecidios), nematodos (nematocecidios), bacterias (bacteriocecidios), etc. A súa existencia débese non só á presenza do parasito, senón tamén aos metabolitos ou ás substancias químicas que este segrega. Estas substancias, de estrutura similar á das hormonas vexetais do crecemento, son capaces de iniciar, estimular e dirixir o desenvolvemento das células vexetais en direccións distintas ás propias. As que se producen nos carballos reciben o nome de bugallos ou cocas.