Chorimas

Revista editada dende setembro de 1984 ata 1986 pola Dirección Xeral de Política Lingüística da Xunta de Galicia. Tratábase dunha publicación centrada nos nenos, redactada integramente en galego. Na súa estrutura interna acolleu seccións de cómic, redaccións e debuxos dos nenos, traballos dos profesores e unidades didácticas. Entre os seus colaboradores figuraban Mª do Carme Ríos Panisse, Xesús Costa Rodil, Xosé A. Pombo e David Otero. Tentaba ser un instrumento de traballo e comunicación para todos os membros da comunidade educativa, e tiña como antecedente Vagalume. Ademais de incluír costumes e tradicións, tamén apostaba pola procura dunha formación integral de calidade. A metodoloxía empregada parte de propostas didácticas dos mestres que os alumnos desenvolvían a través de diferentes traballos. Cada artigo procedía dun colexio distinto e constaba dunha exposición do profesor seguida do traballo do alumno, que ben podía ser un debuxo, un conto, un estudo ou un cómic.