"Moncho" (Contén)

GALICIA

Artista plástico achegado á linguaxe máis conceptual da abstracción. Interesado nas relacións entre arte e industria, adoita introducir montaxes a base de máquinas, luz e son. A súa obra céntrase no ensalzamento das mutacións do material e da luz sobre os materiais, normalmente granito, formigón ou ferro, sempre en diálogo co espacio. Comeza a expoñer en 1987. Ten obras instaladas na Praza Roxa de Santiago, na ría do Burgo (A Coruña) ou no Polígono do Esteiro (Ferrol). A finais dos noventa achégase a ideas minimalistas expresadas en obras como a Caracola (1995), a carón da emblemática Torre de Hércules.

GALICIA

Fotógrafo e deseñador gráfico. De nome Ramón Orlando López Sabín, iniciouse de xeito autodidacta na fotografía (1975) e fíxose profesional en 1979. Correspondente gráfico da Axencia EFE a partir de 1982, traballou para a Editorial Atlántico (1986-1987) e colaborou con La Voz de Galicia, Ferrol Diario ou Motor 16. Cun arquivo composto por máis de 30.000 fotografías, ilustrou numerosos libros e guías da Coruña, Lousame ou do Camiño de Peregrinación a Santiago. Recibiu o I Premio de Etnografía do Museo do Pobo Galego (1980) e o I Premio Colección Paisaxe da Asociación de Prensa de Ferrol (1989).