"Santa Catarina" (Contén)

Mosteiro situado en Cervás (Ares). Construído en 1393 nun estilo románico de transición ao gótico, destaca especialmente un dos seus dous claustros, de estilo renacentista. A igrexa sufriu modificacións no s XVIII, pasando de ter planta en forma de cruz a unha nave de cuberta única con bóveda de canón. Destaca o retablo barroco de madeira. O mosteiro viuse afectado en 1837 pola desamortización de Mendizábal, e os relixiosos franciscanos tiveron que abandonalo en favor do exército, en mans de quen estivo ata o ano 2000.

Estado da rexión Sul de Brasil (95.443 km2; 5.356.360 h [2000]). A súa capital é Florianópolis. A rexión marítima é unha chaira baixa, anegable, con algunhas lagoas. A Serra do Mar forma a divisoria entre a rexión marítima e a do interior. Todos os ríos da rexión interior son tributarios do Uruguay, mentres que os ríos da rexión marítima desembocan no Océano Atlántico. Cultívase té, algodón, cana de azucre, trigo e tabaco e críase gando bovino e caprino.

Mosteiro da península de Sinaí situado na vertente NL do djebel Mūsā. Construído por Xustiniano (530?) para protexer os numerosos solitarios do deserto, está rodeado por unha enorme muralla e ateigado de construcións, das que destacan a basílica xustiniana co seu campanario, a mesquita (s XIV), a hospedaría e a biblioteca. A igrexa, de tres naves separadas por columnas de granito, está dedicada á Transfiguración.