"Vanguard" (Contén)

Colectivo de mulleres de ideoloxía anarquista que actuou na Coruña entre 1933-1935, e integrado na FAI. Entre as súas compoñentes destacan Sebastiana Vitales, retornada de EE UU, e a sindicalista Laura López. Na Fronte Popular, o grupo converteuse no xermolo da organización Mujeres Libres da Coruña.

Institución pedagóxica de orientación galeguista creada na Coruña en 1934. Os seus membros fundadores foron Mª Luísa Vicente, Gustavo Díaz Sánchez, que ademais a presidiu, Xosefina Teijeiro Orosa, Manuel Díaz Rozas e Xosé Toba Fernández. Chegou a reunir uns 200 mestres, dos que destacaron Marcelino Pedreira -animador das colonias escolares da Coruña- e Francisco Vales Villamarín -impulsor do Museo Pedagóxico Rexional-. A partir de abril de 1935 comezou a editar o seu propio Boletín de Vanguardia Pedagógica.

Proxecto de EE UU, feito público en 1955, destinado a colocar en órbita o primeiro satélite artificial.

Xornal vespertino publicado en Lugo entre 1931 e 1933. De tendencia republicana, liberal e laica, os seus fundadores e propietarios foron os irmáns Correa Calderón, que orientaron o xornal cara á información cultural e educativa. Contaron cunha destacada nómina de colaboradores, como Alexandre Bóveda, R. Otero Pedrayo, R. Suárez Picallo e Castelao.

Xornal de información xeral publicado en Barcelona a partir do 1 de febreiro de 1881. Fundado polos irmáns Carlos e Bartolomeo Godó para apoiar o Partido Liberal en Barcelona, en 1887 fíxose cargo do xornal Ramón Godó, quen acometeu unha primeira reforma do xornal: abandonou a súa filiación partidista, reorientouno cara á burguesía catalá e imprimiulle maior axilidade informativa. O xornal quedou en mans dun comité anarquista durante a Guerra Civil. Recuperada a propiedade pola familia Godó tras o conflito, foi dirixido por Manuel Aznar co subtítulo “Española” durante o Franquismo. O 3 de outubro de 1989 acometeu unha nova reforma e incorporou a cor ás súas páxinas.