chuchamel

Herbácea pilosa do xénero Lamium, da familia das lamiáceas, de talos con sección cadrada, de ata 60 cm de altura, e con follas pecioladas, opostas e dentadas. As flores presentan un cálice tubular, con cinco dentes longos, e unha corola bilabiada de ata 20 mm de longo cun anel de pelos na gorxa. O labio superior é cóncavo e debaixo del sitúanse as anteras; o labio inferior leva tres lóbulos. As flores dan lugar a catro núculas. En Galicia están presentes as especies L. album, tamén denominado beldrasto, perenne e de flores de cor branca, propia de sebes e camiños do noroeste do país; L. amplexicaule, anual, de follas arredondadas e flores de cor púrpura, propia de terras cultivadas, paredes e beiras de camiños; L. hybridum, anual, de follas fondamente dentadas e flores purpúreas, en terras cultivadas e beiras de camiños do sueste do país; L. maculatum, perenne, de follas con manchas brancas e flores de cor púrpura, común en sebes, baldíos e cultivos; e L. purpureum, anual, de follas dentadas, flores de cor púrpura e propia de terras cultivadas.

Herbácea de flores tubulares das familias das lamiáceas, boraxináceas e escrofulariáceas.