Clodio/Clodia

Antropónimo procedente do latín Claudius, nome da gens Claudia, familia patricia da antiga Roma á que pertenceron os emperadores Tiberio, Calígula, Claudio e Nerón. Esta voz deriva, á súa vez, do cognome Claudus ‘coxo’. Na etapa republicana xa se rexistra a súa variante popular Clodius, resultado da monotongación de au en o. Este prenome presenta as variantes Croio, Claudio/Claudia e Claudina, e o hipocorístico Quiniño. Entre os santos que levan este nome cómpre salientar, o mártir Clodio (s III), o arcebispo Claudio de Besançon (s VII), o mártir Claudio de Ostia (s III); e, entre as santas, a mártir Paflagonia Claudia (s IV), unha virxe e mártir con san Teodoto, e outra mártir romana do s I. San Clodio celébrase o 19 de abril e o 30 de outubro, e é titular de tres parroquias (unha na forma Claudio), mentres que Claudia se celebra o 20 de marzo.