Colmar

Capital do departamento do Alto Rin, na Alsacia, Francia, situada nos contrafortes dos Vosgos (63.498 h [1996]). É un importante núcleo industrial, no que destaca a fabricación de tecidos, reloxos e produtos alimentarios. Fundada no ano 833 por Luís o Piadoso, converteuse nunha cidade imperial libre. Anexionada a Francia por Luís XIV no ano 1672, pasou a formar parte de Alemaña entre 1871 e 1918, ano no que volveu ser francesa. Entre os seus monumentos destaca a igrexa de San Martiño (1237-1366) e o museo dos Unterlinden, instalado no antigo convento dominicano do mesmo nome (ss XIII e XIV).