Crangon

Xénero de camaróns de ata 7 cm de lonxitude, de corpo algo translúcido, cor agrisada e ollos grandes. Aliméntanse tanto de pequenos animais como de algas. Viven en augas tranquilas e salobres das marismas e das praias próximas ás embocaduras dos ríos. Son animais proterándricos que durante os dous primeiros anos de vida teñen as gónadas masculinas maduras e, despois deste tempo, madúranlles as gónadas femininas. Os individuos que se comportan como femias teñen dúas postas ao ano duns 10.000 ovos de cada vez, que transportan nas patas abdominais durante dous meses. Poden vivir ata catro anos. A especie C. crangon está presente no Mar Báltico e no Océano Atlántico oriental ata o S da Península Ibérica.