Cuveiro Piñol, Xoán

Escritor. Compaxinou o seu traballo como funcionario da delegación provincial de Facenda en Pontevedra co mundo das letras e da lingüística. É autor dunha gramática titulada El habla gallega. Observaciones y datos sobre su origen y vicisitudes (1868), que contén unha antoloxía e que segue en exceso os modelos das gramáticas do castelán. No terreo lexicográfico realizou un Dicionario gallego-castellano (1876) (o seu título completo é Dicionario gallego, el más completo en términos y acepciones de todo lo publicado hasta el día, con las voces antiguas que figuran en códices, escrituras y documentos antiguos, términos familiares y vulgares y su pronunciación. Para la Escuela de Diplomática, anticuarios, jueces, abogados y otras personas a quienes es indispensable). Para elaborar este dicionario tivo como referencia o que publicara no 1863 Francisco Xavier Rodríguez. Formalmente está coidado xa que intenta achegarse aos estándares da época; nel recóllense unhas 10.943 voces (popularismos, arcaísmos, recollidos correctamente coa marca de rexistro, etc, e non inclúe palabras comúns co castelán, agás os castelanismos arcaicos). Colaborou e promoveu diversas publicacións periódicas en Pontevedra, como Las Musas del Lérez -primeiro xornal literario pontevedrés e no que colaborou Marcial Valladares-, El Circulador, La Distracción, El Vociclero, El Libre Pontevedrés e La Revista, que tivo como redactor a Celso García de la Riega. Escribiu, ademais, diversos textos literarios, como o poema “O mosteiro de Armenteira”, a versión galega dunha biografía de Calderón de la Barca editada en Granada en 1881, en colaboración con Vicente Gutiérrez Piñeiro; o libro Iberia: protohistoria y rectificaciones de algunos hechos históricos (1891); e o drama histórico escrito en verso Pedro Madruga (1897), que ofreceu ao Directorio da Escola Rexional de Declamación (1903) e que finalmente non se representou.

Cronología