dalia

Herbácea do xénero Dahlia, da familia das asteráceas, de raíces fasciculadas. Presenta follas divididas en cinco ou sete folíolos ovais, de bordo dentado ou lixeiramente serrado e dispostas de xeito alterno; capítulos florais terminais ou axilares, con brácteas dispostas en dúas filas; e froitos en aquenio. Existen unhas 30 especies orixinarias de Centroamérica cultivadas en todo o mundo como plantas ornamentais das que se obteñen grandes inflorescencias de distintas cores e formas. As especies máis cultivadas son: D. coccinea, D. excelsa, D. imperialis e D. variabilis.