Deva

Río afluente do Miño pola dereita. Nace na vertente sudoccidental da serra do Faro de Avión, na parroquia de Petán (concello da Cañiza). O seu curso adopta unha dirección meridiana (N-S) coa que drena as parroquias das Achas, Parada das Achas e Valeixe, no concello da Cañiza, e Mourentán e Arbo, no concello de Arbo. Desemboca na última destas despois de percorrer uns 16 km e drenar unha conca de 92 km².